Haiku IDO ed altra poemi.

Til balde!

2012-01-17T01:16:00.001+01:00

Stranja ceno (31esma decembro 1920)

2012-01-02T18:45:00.007+01:00

En la cayara Ido-Renkontro en Echternach (Luxemburgia), me prenis ek la "donacaji" da Yolande Juste libro kompilita da sua patro, Andreas Juste: "Antologio dil Idolinguo". Esas libro kun multa Idala texti. Un de li, esas kopiita sube. Ca texto rakontas to quon ula exterlandano vivis multa yari ante nun ye la noktomezo dil lasta dio dil yaro (Olda Nokto, en la Hispana) en Madrid, nome la "Puerta del Sol". Cayare, ankore me esis ibe, ma ye la antea nokto, ye la 30-esma decembro, ube kustumale esas esayo. Ibe esis same multa personi qui prenis la dekedu vitberi. Yen la texto skribita da R. Nakhla en la yaro 1920:

…Ante cirkum dek yari me asistis stranjega ceno di superstico en granda chefurbo Europala. Me trovesis en la central placo spacoza, rektangulatra, cirkumita de bela domi de tri o quar etaji. Inter oli esis granda administreyo. Ye la supro di ica, qua okupis cirkum duimo di un ek la longa lateri dil rektangulo, montris su, quale sat ofte en tala kazi, granda horlojo kun la Romala cifri dil hori tre facile e tre nete dicernebla.

Esas la 31-esma decembro 1910, kelka minuti ante noktomezo. La central placo, altratempe tote ne remarkinda, ofras nun tre kurioza spektaklo a mea okuli.

Centi de personi, sioruli, siorini, oldi, mez-evanti, yuni, pueri, aristokrati, borgezi e proletarii tote plenigas la ampla placo; li esas preske tante komprensita quante (quale) la sardini, l’anchovi o la haringi en la buxi famoza e tante kar (prizata) da la voyajeri ed exkursanti. Omna ta centi de personi stacas, omni kun ardoro fixigas la okuli a la cifro-placo dil granda horlojo dominacanta la loko e la spektantaro.

Ma pro quo ta universala regardo vers objekto tante komuna, ye kloko tante tarda, en posturo tante fatigiva? Kad ulo extraordinara eventas od eventos en la cifro-plako?

Nule. Ica esas e restas nevarieble senmova e preske tote blanka sub l’elektrala lumo qua kovras ol. La minut-angulo lentege avancas sempre egale. Tamen la centi de stacanta chefurbani de omna klaso ed evo regardadas ol fixe, paciente, nefatigeble, quale se nulo plu atraktiva existus por li altraloke.

Me vane serchas la klefo di ta neacesebla misterio. E me darfas dicar ke se omna mea lekteri esabus apud me en ta neobliviebla placo, li ne sucesabus sen extera helpo deskovrar la solvuro dil enigmato.

Fortunoze me ne esas senhelpa koram ta astoneganta ceno. Ula kapitano samideana akompanas me e sekrete juas pro mea stuporo ed embaraseso. Il dicas a me: “Remarkez ke singlu di ta centi de spektanti tenas en la manuo vitograpo.”

Me atencas ica detalo til nun neobservita. La parolo di mea samideano esas tre justa; mea stuporo augmentas, nam l’enigmato sempre pluobskureskas! Me questionas kun kelkete nervoza nepacientigita kuriozeso: “Quon signifikas to omna? Ol semblas a me stranja ne komprenebla sonjo!”

L’oficiro ridetante e dilatante l’aperturo di sua boko sub nigra labio-barbo fine klarigas plene la misterio. Il dicas a me: “En nia chefurbo esas supersticala kustumo stacar en ica placo koram ica horlojo ye la 31-esma decembre ye noktomezo, tenante en la manuo vinograpo. Ye singla de la dek e du sonora stroki anuncanta la morto dil yaro e la nasko de lua sucedanto, on manjas virbero, e kande on manjis dekedu, on iras adheme kun la joyigiva certeso ke la nova yaro esos felica!”

Advere, se ica moyeno feliceskar esus vere efikiva, nia trista tero de longe cesabus esar lakrimo-valo!

Ma ho ve! La famoza horlojo silencas ye ica nokto-mezo; la minut-agulo ja transiris la maxim alta punto dil cifro-plako e tamen nula stroko sonegas koram la centi de febroza expektanti durstoz ad plena feliceso.

Pos longa vana vartado sub la tote muta horlojo li fine manjas sucede e solene la dekedu tradicionala vitberi e quik pose foriras, portante en sua kordii ne la certeso, ma la nura melankolioza probableso ke li esos felica dum la komencita yaro!

R. NAKHLA (1920)

Felica Krist-Nasko!

2011-12-24T11:55:00.002+01:00

Mafalda en Ido.

2011-12-21T01:24:00.003+01:00

Japoniana autunala poemi (I)

2011-12-02T20:39:00.003+01:00

Grilio, ne kantez

kun tanta doloro:

se tua chagreno esas longa

quale autunal nokto,

plu granda esas la mea.

Fujiwara no Tadafusa

Ca poemeto verkesis ye ula nokto, kande il retrovenis pos adiir sua amorantino ed lore il audis la kantado dil grilio.

La du maxim mikra rakonti...

2011-11-26T11:04:00.003+01:00

Yen la du maxim mikra rakonti skribita en la Hispana:

- L'unesma skribesis da Augusto Monterroso:

Kande lu vekis su, la dinosaurio ankore esis ibe.

- La duesma skribesis da Luis Felipe Lomelí e nomesas "La emigranto"

Ka vu obliviis ulo? Utinam!*

En la originala rakonto, Lomelí uzas la Hispana vorto "ojalá" qua venas direkte ek la Araba. La korekta signifiko di ta vorto esas "Deo volez!", ma me kredas ke hike esas plu simila o plu bela uzar la latina vorto.

Olima Esperantisto...pre-Idisto...

2011-10-25T00:46:00.002+02:00

Kelka dii ante nun, me komencis lektar libro pri la vivo dil kreinto dil Esperanto: Zamenhoff (La homo qua defiis Babel). Lektante l’anciena historio dil Esperanto, onu povas vidar ke un dil unesma lernanti ed Esperantisti en Hispania esis José Rodríguez Huertas, esperantisto di la Hispana provinco di Malaga, ma anke olima Volapük-isto. Il facis l’unesma lerno-libro en la Hispana (antee Edwar de Wahl publikigis l’unesma vortaro) pri Esperanto. En la yaro 1890 il skribas la libro Gramatica, Ejercicios y Diccionario de la Linguo Internacia. Ye ca libro, l’autoro esas flexebla Esperantisto, fakte il esas preske “pre-Idisto”. Il nomas Esperanto quale “Lingua (linguo) internacia”. Onu ya povas vidar ke la ne tro facila “v” di “lingvo” desaparas. Fakte, ye multa “v”-ala vorti, tala litero anke desaparas: akuo vice akvo (nia aquo), kuar vice kvar (nia quar), kuin vice kvin (nia kin)…José Rodriguez Huertas anke uzas la “y” qua ne existas en Esperanto por la pluralo e la sono “j”. Tale, il skribas yes, yam e yaro vice jes, jam e jaro. Preske quale ni! Dum la docado en lua lerno-libro, il anke desaparigas l’akuzativo!!! Fakte, segun kelka interretala dokumenti, il skribas Mi legas via letero! vice Mi legas vian leteron (Me lektas via letro). Il anke propozas ne nur un artikli definita ma kelka, nome uzar le por la maskulino, la por la femenino e ley e lay por la pluralo. En ca libro, on povas lektar ke Zamenhoff ipsa skribis a Edwar de Wahl ke “on devas korektigar parto dil gramatiko da Huertas”.

Juan de Mairena (I)

2011-10-22T17:20:00.002+02:00

Mairena: Sioro Martínez, voluntez irar aden l’ardeza tabelo e skribez:

L’anciena espadi di glorioza tempi…

Martínez obedias.

Mairena: A qua tempo vu kredas ke la poeto aludas?

Martínez: A ta tempo, kande l’espadi ne esis anciena…

Juan de Mairena.

da Antonio Machado.

Sajeso...

2011-10-22T01:05:00.002+02:00

Linguo Universala da Bonifacio Sotos Ochando.

2011-10-21T21:07:00.001+02:00

Strado dedikita en Albacete al sacerdoto e filozofo Bonifacio Sotos Ochando, kreinto ye la yaro 1824 di la Linguo Universala qua prenis lua nomo, preske ne-konocata da multa samurbani.

Elefanteto (mikra rakonto per kamishibai*)

2011-10-01T18:29:00.008+02:00

Kelka dii ante nun, me rakontis ca rakonto a mea sisyara gelernanti per kamishibai*. Kamishibai* esas anciena Japoniana moyeno por rakontar la rakonti. Pro to, vi lektos kelka frazi e questioni olquin la spekteri, sive infanti, sive adulti devas respondar. Me jus tradukis ca rakonto kun la korektiganta helpo di Partaka e Tiberio. La rakonto skribesis e desegnesis da ula laborema instruktisti.

Elefanteto
View more presentations from yanago.

Waka da Fujiwara.

2011-09-20T16:38:00.004+02:00

Quankam ne esus

evidenta al okuli

l'arivo dil autuno,

esas la bruiso dil vento

to quo alertabis ni.

Fujiwara no Toshiyuki

Fujiwara no Toshiyuki (? - 907) esis japoniana waka-poeto dil periodo Heian. Il nominesis kom un dil triadek-e-sis nemortiva poeti.

Poemeto da Pessoa.

2011-08-31T13:18:00.004+02:00

Omna amor-letri esas

ridinda.

Ne esus amor-letri se ne esus

ridinda.

Anke en mea tempo me skribis amor-letri,

quale le cetera,

ridinda.

La amor-letri, se esas amo,

mustas esar

ridinda.

Ma, fine,

nur la personi qui nultempe skribis

amor-letri

esas ta qui esas

ridinda.

Álvaro de Campos (un dil multa pseudonimi di Fernando Pessoa)

Quar interesiva Idala post-karti.

2011-08-30T10:35:00.003+02:00

La papiliono e Moritake...

2011-08-26T12:48:00.004+02:00

Ka falinta floro

qua rivenas til la brancho?

No, ol es papiliono!

Arakida Moritake (1473 – 1549)

Nur kande ula haijin (skriptero di haiku-i) experiencias to, quon onu ja rakontis, esas kande lu tote prizas un haiku antee lektita. To esis quo eventis a me kelka dii ante nun. Esis ula promenado tra la montaro, l’arbori e grandega petri quin onu povas regardar inter du vilaji: Echternach e Bedford, tra la Mikra Suisia Luxemburgiana.

La peizajo esas impresiva. La arbor-folii flaveskas, quo produktas ke anke, per ula preske ja autunala somero, li komencas falar…

Ye ula di ca instanti, preske magiala di atencoza regardado dil naturo qua cirkondas ni, me kredis vidar ula flava papiliono kun rapida flugado til la sulo…ma quala esis mea surprizo kande me vidis ke to, quo pasis rapidege avan me, per ne-konocata rapideso, ne esis papiliono…ma ula folio jus falinta…Mea mento retroiris kelka yari ante nun e quik voyajis a Japonia…

Dum ca instanto, me saveskis (o ton me kredas) quon Moritake sentis kande il skribis lua maxim konocata haiku, ne esis ula floro, ma ula sika folio…e ula papiliono. E la papiliono di Moritake ibe acensis, ma la mea falis en la sulo…

la folii falas…

anke me kredis

ke ol esis papiliono

Haiku 38.

2011-08-07T21:17:00.003+02:00

mareo...

la ligno-planki krakas

dum ke me forigas

Kovrita voyo (Idala Haikuala Libreto)

2011-07-13T17:31:00.000+02:00

Kovrita voyo

Publish at Calaméo or browse others.

Diskurso pri haiku-i e lingui.

2011-07-11T17:48:00.004+02:00

Kar amiki,

dum tri dii, del 6esma til 8esma julio, multa Hispana amiki haijin-i* (skripteri di haiku), cirkum quaradek ek kelka Hispana provinci asistis la duesma somerala kurso pri haiku. Anke esis du exterlandana membrini, un de Arjentinia ed altra de Francia.

Ibe, me povis parolar dum duadek minuti pri la haiku-i ye altra lingui. Tale, me parolis pri nia komuna linguo e pri la facita haiku da Heidi Neussner e da me ipsa. Membri dil kurso recevis propagili en la Hispana pri Ido. Kelki povis lektar e pose portar exempleri dil revueto Ido-Saluto e lektar la haiku-i da Heidi Neussner. L’asistanti anke recevis broshuro kun la sama haiku ye 52 lingui, multa de li, artificiala.

Tale, quaradek membri povis konocar (nulu antee konocis) nia linguo, nia forumi e mea blogo.

Til hike, me volas dankar tri membri:

- la membri di “posta-mundi” e Partaka, qua helpis me por havar la sama haiku ye multa artificiala lingui.

- Alfred Neussner, qua sendis a me exempleri di “Pasema Instanti”.

- Eberhard Scholz, qua sendis a me exempleri di Ido-Saluto e la propagili en la Hispana.

Vera Demokratio Ja!

2011-05-26T00:20:00.003+02:00

Depos la 15esma mayo, multa asistanti ye multa urbi di Hispania manifestis pro vera demokratio ye nia lando. Ye kelka jurnali internacionala onu povis lektar pri “Hispana Revoluciono”. Vere, nulu povas dicar ke Hispania, pos 33 yari, ne esas demokratio, kande ni sufris multa diktatorala yari. Ma nia demokratio povas esar plu bona. Vere, nia demokratio devus ne esar nur bi-demokratio ye politiko. Se vi ne kredas, vi povas lektar e komprenar quo eventis ye mea urbo. En mea urbo, prizentesis sep partisi, ma nur tri obtenis skabini:

P.P. (Populara Partiso) 16 skabini (46.000 voti)

P.S.O.E. (Hispana Socialista Laborista Partiso) 10 skabini (30.000 voti)

I.U. (Unaja Siniestra) 1 skabini (5500 voti)

Ma, kande onu lektas la bezonata voti por singla partiso, onu povas vidar ke l’unesma partiso bezonis 2800 voti por nur un skabino, ma la triesma partiso obtenis lua sola skabino per 5500 voti! Ka to esas yusta? Me vere ne kredas lo. Esus plu bone proporcionala sistemo…

Vere, me havas fortuno, nam me havas fixa laboro, ma esas multa Hispaniani qui ne havas laboro depos kelka yari e nun li sufras pro lia domi, lia filii…ma la problemo esas plu grava. Quale sempre, la problemo e la solvo, segun mea opiniono, kompreneble, esas la edukado, la vera edukado. Multa yuni ne volis studiar pro ke laborante ye la konstrukto li ganis multa pekunio…ma omni pensis kelkafoye…ka la konstrukto ne povus esar dum multa tempo la (preske) sola vera e granda industria en Hispania…La tempo montris ke no…Hispania bezonas bona edukado, bona industria e vera demokratio.

Japoniana klasika tanka (II)

2011-04-23T13:54:00.003+02:00

Printempala nokto,

lua obskureso esas ne-utila

quankam lu celas la koloro

dil flori dil cerizo...

Ka anke celas lua parfumo?

La milito esas finita (originala mikra rakonto)

2011-04-22T20:46:00.003+02:00

Quamkam esis printempo, la nokto esis obskura e kolda. On ne ja audabis krii nek bombardi. Ye la stradi, regnis la silencio dum la tota nokto. La milito esis finita. To dicabis ula homo per la radio, ula militala chefo, me supozas. Nun me ne audis muziko. Ta auroro, me ne acendis la radio por audar lu. Me timis pro tu, me timis ne povar vidor tu. Me timis ne povar dancor kun tu la muziko quan ni audis per la radio, ye nia radio…Ula sono ne tre fore, arachis mea lakrimi: del tombeyo on audis kelka pafadi.. La milito esis finita…

O vos omnes (Tomás Luis de Victoria)

2011-04-22T12:14:00.003+02:00

En la latina:

O vos omnes
qui transitis per viam,
attendite et videte:
si est dolor similis
sicut dolor meus.

Attendite
universi populi,
et videte dolorem meum:
si est dolor similis
sicut dolor meus.

En Ido:

Ho, vi omna

qua pasis pro la voyo,

atencez e regardez

se esas simila doloro

quale mea doloro.

Atencez,
populi dil universo,
e regardez mea dolor,
se esas simila doloro
quale mea doloro.

La "saeta" da Antonio Machado.

2011-04-18T12:16:00.007+02:00

Ho, la saeta, la kantar
al Kristo dil cigani,
sempre kun sango ye la manui,
sempre pro desklovagar!
Kantar dil Andaluci-ana populo,
qua omna la printempi
esas demandanta eskaleri
por ascensar al kruco!
Kantar di mea lando
qua lansas flori al Iesus dil agonio,
e qua esas la fido di mea majori.
Ho tu ne esas mea kantar!
Me ne povas kantar, ne volas
a ta Iesus dil ligno,
ma ti qua promenis sur la maro!

poemo da Antonio Machado, muziko da Joan Manuel Serrat.

Ube irar?

2011-04-13T12:08:00.002+02:00

Kelka personi questionis a Nasrudin: “Ube ni mustus irar dum funerala procesiono. Ka avane? Ka dope? Ka flanke?

Nasrudin respondis: Ne esas grava ube tu irez, kontre ke tu ne esez interne la sarko!

Japoniana klasika tanka* (I)

2011-04-11T18:20:00.003+02:00

Kun quo komparar

nia vivo en ica mondo?

Kun barko qua departas

frue matine

e tracon ne lasas.

Manzei.

Mikra Idala ludo.

2011-02-13T19:56:00.011+01:00

Kar amiki,

quankam ica blogo esas pri haiku ed altra poemi, me anke volas pozar hike nova ludo quan mea gelernanti ja konocas en la Hispana. To permisas ludar kun nia linguo a komencanti.

Yen la kurso quan me facis kun la desegnala helpo di José Cossío.

http://linguoido.ning.com/forum/topics/kurseto-por-infanti

Yen vi povas ludar:

Ludez bone!

Quante kustas lernar?

2011-02-02T10:51:00.003+01:00

Nasrudin decidis ke il povus profitar su se il komencus lernar irgo nova e vizitis tre konocata docisto di muziko.

- Quante pekunio vu demandus a me por komencar lenar plear la fluto? – questionis Nasrudin.

- Tri moneti d’arjento ye l’unesma monato; pose un moneto d’arjento po monati – respondis la docisto.

-Tre bone! – dicis Nasrudin – Tale, me komencos ye la duesma monato.

Poemo da Kozan Ichikyo

2011-01-07T22:21:00.005+01:00

Me venis aden la mondo
kun vakua manui.
Senkalza me lasas ol.
Venar, departar.
Du simpla eventi
qui krucumesas.

Kozan Ichikyo skribis ca poemo ye lua mort-dio. Lu mortis en la yaro 1360.

Haiku-i di Nov-Yaro (Issa)

2010-12-27T18:46:00.004+01:00

Ho! Esar quale

un infanto

la Nov-Yaro dio!

Kobayashi Issa (1763 - 1827)

Santa Niklaus serchas...(infantala rakonti por Krist-Nasko)

2010-12-20T21:04:00.001+01:00

Santa Niklaus serchas...

View more presentations from yanago.

Poemo da Shu Chung (I)

2010-12-19T20:12:00.004+01:00

Esas blanka nubi en la cielo,

granda kosti eskarpa elevas su adsupre.

Sen-fina esas la voyi dil tero,

montari e riveri obstruktas la voyo:

me pregas tu ne mortar.

Voluntez retorvenar itere.

Me savas omna la rakonti (León Felipe)

2010-12-18T21:18:00.003+01:00

Me tradukis mikra ma bela poemo dil Hispana poeto León Felipe qua mortis en Mexikia ye la yaro 1968.

Me ne savas multa kozi, to esas la vereso.

Me nur dicas to quon me vidis.

E me vidis:

ke on bersis la bersilo dil homo per rakonti...

ke la klamadi d’angoro dil homo sufekesis dal rakonti...

ke on tamponizas la plorado dil homo per rakonti

ke on enterigas l’osti dil homo per rakonti...

e ke la pavoro dil homo inventis omna la rakonti.

Me ne savas multa kozi, to esas la vereso.

Ma on dormis a me per omna la rakonti…

E me savas omna la rakonti…

Haiku 37.

2010-12-17T15:41:00.004+01:00

jorneskas -

anke en la sek folii

la brilo dil roso

Irlandana benediko.

2010-12-13T00:27:00.005+01:00

Kom Krist-nasko proximigeskas, me trovis ca Irlandana benediko quan me tradukis.

Ke la voyi apertesez ye tua renkontro,
ke la suno brilez sur tua vizajo,
ke la pluvo falez tranquila
sur tua agri,
ke la vento suflez sempre ye tua dorso.

Ke tu gardez ye tua kordio kun gratitudo
la belega memoro
dil kozi bona dil vivo.

Ke omna donacajo di Deo kreskas ye tu
e helpez tu por portar la gayeso
aden la kordii di ti personi quin tu amas.

Ke tua okuli reflexez brilo
di amikeso,
afabla e jeneroza quale la suno,
qua ekiras inter la nubi
e varmigas la maro tranquila.

Ke la forco di Deo mantenez tu ferma,
ke l’okuli di Deo regardez tu,
ke l’oreli di Deo askoltez tu,
ke la vorto di Deo parolez a tu,
ke la mano di Deo, protektez a tu,
e ke til un nova renkontro,
altru tenis tu e ni omna,
per la palmo di lua mano.

Jarcha* (I)

2010-11-17T10:19:00.003+01:00

En la Hispan-araba linguo.

¡Tanto amare, tanto amare,
habib, tant amare!
Enfermeron olios nidios,
e dolen tan male

Tradukita aden Ido.

Tante amar, tante amar,
mea amoranto, tante amar!
Maladeskis mea brilanta okuli
e tante li doloras a me!

Hike esas plu multa lumo (sufí-ana legendo II )

2010-11-13T12:55:00.004+01:00

Ulu vidis Nasrudin serchanta ulo en la sulo.
- Quon tu perdis, Mulá*? – il questionis.
- Mea klefo . – respondis la Mulá*.
Tale, ambi genupozis su por serchar lu. Pos poka tempo, la homo itere questionis:
- Ube la klefo falis exakte?
- Ye mea domo.
- Tale…pro quo vu serchas hike?
- Esas plu multa lumo hike kam en mea domo.

Nasrudin

2010-11-13T02:08:00.003+01:00

Nasrudin (anke Nasreddin)

Qua levas frue...(sufi*-ana legendo I )

2010-11-13T02:04:00.006+01:00

- Nasrudín, mea filiulo, levez tu frue matine.

- Pro quo, patro?

- Esas bona kustumo. Uladie, me levis me frue ante jorneskar e me ekiris promenar. En la voyo,
me trovis ula burso qua kontenis oro.

- Quale tu savas ke ol ne perdesis ye la antea nokto?

- To ne esas la questiono nun. Irgaforme, me verifikis ke ye la antea nokto la burso ne esis ibe.

- Tale, me kredas ke levar su frue ne donas fortuno ad omni nam…qua perdis l’oro posible levis su ante kam tu.

Poemo da Abu-l-Hasan al-Husri

2010-11-03T22:34:00.004+01:00

Se la blanka esas la koloro dil vesto

en al-Andalus, to esas yusta kozo.

Ka tu ne vidas a me, qua vestizesas per la blanka

hari pro ke me trauras pro la yuneso?

Abu-l-Hasan al-Husri, la blindulo. (m. 1095)

Haiku da Gonsui

2010-10-22T01:14:00.005+02:00

La vintrala tempesto

finas ye la bruiso

dil maro.

Ikenishi Gonsui (1650 - 1722)

Haiku da Michihiko

2010-09-29T10:15:00.003+02:00

la luno, la nivo,

e nun, tra la pluveto,

la lumo dil matino!

Oku Michihiko (1755 - 1818)

Haiku da Sora

2010-09-11T15:38:00.007+02:00

Me marchas omnadie.

Se me mustas falar,

ke co esez inter l'arbori.

Kawai Sora (1649 - 1710)

Haiku da Sodô

2010-09-08T21:58:00.003+02:00

Havas nulo

mea kabanacho printempe.

Olu havas omno.

Yamaguchi Sodô (1642 - 1716)

Haiku da Kigin (I)

2010-09-07T17:51:00.008+02:00

Esas la povreso dil somero.

Elu respondas

ante ploreskegar.

Kitamura Kigin (1623 - 1705)

Po Chu - I

2010-09-05T11:30:00.005+02:00

Po Chu-I naskis ye Xia-kuei, en Shen-xi en la yaro 772. Esis guvernanto di Hang-chow e Shu-chow. Il verkis la du maxim konocata larga poemi dil epoko Tang. On dicas ke Po Chu-I lektis lua poemi al lavistini en la rivero ed il nur konsideris lua poemi kom bona kande eli komprenis li. Il mortis ye la yaro 846.

Poemo da Po Chu-I (I)

2010-09-05T11:19:00.004+02:00

Sugesto a mea amiko Liu

Esas verda brilo ye ula anciena botelo,
on povas vidar la reda ye la tranquila stuvo.
On sentas la koldeso ye la nivo ibe fore...
Ka ulo de vino hike en la domo?

Po Chu-I (772-846)

Poemo da Wang Wei (I)

2010-08-18T20:40:00.005+02:00

La bosko di bambuo.

Me sideskesas sola, en la bosko di bambuo,
me pleas la liuto, me suflas dum multa tempo.
Poka homi konocas la profunda bosko,
la brilanta luno venas e proximigas lua klareso.

Wang Wei (699-759 d.C.)

Haiku da Santôka (V)

2010-08-02T12:04:00.003+02:00

Kande onu ne povas manjar,
la fresheso dil aquo

Taneda Santôka (1882 - 1940)

Poemo da Shakîr Wa'el (II)

2010-07-21T17:28:00.002+02:00

Serchate libereso,
me finabis ye la pordo
di tua karcero
e me ja ne konocas
plusa klefo kam tua amoro.

Shakîr Wa'el (1232 - 1260)

Haiku da Shokaku (I)

2010-06-13T20:43:00.002+02:00

Dekesma monato dil yaro.
Me iras aden nula loko,
nulu venas ad-hike.

Shokaku (1650 - 1722)

Haiku da îo Sôgi

2010-06-01T14:00:00.003+02:00

Maiflori, pensez
ke qua voyajas
anke regardas vi.

Îo Sôgi (1421 - 1502)

Mikra rakonto.

2010-05-09T12:13:00.001+02:00

Nur la vento parkuras la pavara stradi. Nek sospiri, nek “me amas tu”, nek disputi, nek la plorado di un infanto. Nur la vento. Sub cent-yara arboro, apud la kirko me regardas la horizonto, makulizata di reda pro la noktesko. Fore, hano kantas. Hano di fora vilajeto ube ankore habitas ulu. Ulu. Ulu esas personigeso di nulu. Pro ke hike esas nulu. Nulu kantas, nek ploras, nek ridas, nek jemas. La folii kovras, quale omna autuno, la stradi dil vilajeto, ma nulu presas li. Nur la vento movas li. Me mustas askoltar ulu. Pro to, me klamas e, dum kelka sekundi, me askoltas mea eko.

Haiku 36

2010-04-25T17:24:00.003+02:00

tante efemera...
la flori dil ceriz-arboro
en la voyo

Trista militi da Miguel Hernández

2010-03-27T12:00:00.005+01:00

Trista militi
se ne esas amoro la skopo
trista, trista.

Trista armi
se ne esas la vorti.
Trista trista.

Trista homi
se ne mortas pro amoro.
Trista, trista.

Poemo da la Hispana poeto Miguel Hernandez qua naskis ye 1910 e mortis pos la Hispana civitanala milito ye la karcero di Alicante en la yaro 1942 evante nur 31 yari.

Poezio (originala poemo)

2010-03-25T11:36:00.001+01:00

La poezio
esas realeso.
La poezio esas la nubo en la cielo,
la rozo en la gardeno,
la ucelo di la mateno,
la kiso por tu.
La poezio
esas realeso.
La cikonio qua mortis,
La infanto qua ja ne ploras
pro ke anke mortis.
La poezio anke es
la nubo qua makulizesis
e ke me itere ne volas vidar.
La poezio
ne esas la inventata nebulo,
nek la ruptita binoklo por ne vidar.
La poezio
esas la binoklo
kun qua vidar
la mondo e la realeso,
kun qua vidar
la vereso.

Haiku 36.

2010-03-10T18:08:00.002+01:00

pasis la pluvo -
l'uni pos l'altri
l'infanti ye la flako

Saigyō Hōshi

2010-02-27T20:41:00.003+01:00

Saigyō Hōshi naskis en Kioto ye la yaro 1118 e

mortis en la templo di Hirokawa evante 72 yari.

Desegno da Kikuchi Yōsai.

Waka da Saigyō (I)

2010-02-27T20:19:00.008+01:00

moro tomo ni

tabi naru sura ni

tsuki idete

sumebaya kage no

aware naruran

Kune ni facus

la voyajo; me sur la tero,
e lu en la cielo,

se esus la luno dum tota la nokto:

duopla konkordo.

Saigyō (1118 - 1190)

Haiku da Kijoo.

2010-02-21T13:08:00.003+01:00

tooyama / no
yuki / ni / tobi / keri
karasu / niwa

Sur la nivo
en ita fora monto
flugas du korvi.

Kijoo

Haiku da Shiki.

2010-01-23T16:49:00.007+01:00

daikan / ya
hachigatsu / hoshiki
matsu / no / tsuki

Esas vintro,
krucante la vilajeto
aboyas la hundi.

Shiki (1862 - 1902)

Haiku 35.

2010-01-14T12:40:00.002+01:00

pordo apertesas -
nulu enir nek ekir
ecepte la vento

Haiku 34.

2010-01-12T18:55:00.004+01:00

sen direciono,

movita da la vento,

la sek folii

Haiku 33.

2010-01-08T12:36:00.003+01:00

Ye la tombeyo,

cipresi e tombi

kovrita da nivo.

Haiku 32.

2010-01-04T08:53:00.001+01:00

recenta flako -

ye la reflexo dil arboro

drinkas l'uceli

Haiku da Issa

2010-01-02T12:58:00.002+01:00

Shôgatsu / no

kodomo / ni / natte

mitaki / kana

Ye la Nov-Yaro,

qua povus itere

divenor infanto!

Kobayashi Issa (1763 - 1827)

Haiku da Sôkan (II)

2010-01-01T17:17:00.005+01:00

gantan / no

miru / mono / ni / sen

Fuji / no / yama

Nov-Yaro dio:

lo maxim bone esas regardar

la monto Fuji.

Sôkan (1465 - 1553)

Haiku da Onitsura.

2009-12-26T13:56:00.003+01:00

Me manjis

"globo-fisho" e pose

komencis nivar.

Ueshima Onitsura (1661-1738)

Haiku 31

2009-12-23T19:49:00.003+01:00

pruinat agro -

pokope ye la burjoni,

la sunoradii

Haiku 30.

2009-12-15T11:28:00.003+01:00

Jorneskas.

Ulu plu ante kam me

presis la nivo.

Gregueria-i da Ramón G. de la Serna (I)

2009-12-10T16:38:00.006+01:00

- La ok esas la sablo-horlojo dil numeri.

- La jirafo esas krano qua manjas herbo.

- La maxim mikra fervoyo en la mondo esas la raupo.

- Nur la poeto havas lun-horlojo.

Ramón Gómez de la Serna (1888 - 1963) esis la kreinto dil "greguería" (en la Hispana) o "échantillons" (en la Franca) mikra texti injenioza e humoroza di un frazo.

Haiku da Santôka (IV)

2009-12-03T20:17:00.003+01:00

Bone, ad-ube ni iros?...

Suflas la vento.

Taneda Santôka (1882-1940)

Japoniana arto. (II)

2009-11-24T20:25:00.002+01:00

La domo dil teo en Koishikawa. La matino pos nivir. da Hokusai.

(Triadek-e-sis vidaji dil monto Fuji)

Haiku da Ryûsui (I)

2009-11-22T10:59:00.003+01:00

mayoigo / no

naku / naku / tsukamu

hotaru / kana

Krias e krias,

unglo-sizananta libeluli,

la nura infanto.

Ryûsui (s. XVII)

Haiku 29.

2009-11-21T17:17:00.005+01:00

Obskura nokto,

en la lanterni-serio

un es ruptita.

Haiku da Santôka (III)

2009-11-19T12:52:00.006+01:00

hitori sagayaseba
utari nari

Kande me laboras nura l'agro
ekiras un kansono.

Taneda Santôka (1882 - 1940)

Pri la mezurata haiku.

2009-11-16T16:36:00.003+01:00

Quale vi povas konstatar mea lasta haiku-i ne esas skribita en la normala e klasika haiku-ala mezuro di 5 - 7 - 5, ma en libera verso. Tale me expresas tre bone. Ico ne volas dicar ke me ne plus skribos haiku-i en la tradicionala mezuro, ma me esas vere plu komoda skribante tala haiku-i. La obligata mezuro ne facas la poemi, ma la sentimenti ed en la haiku-i quon onu vidas, askoltas, odoras...

Haiku 28.

2009-11-16T16:28:00.003+01:00

Frostigit matino.

Nur la koldeso che la vizajo

es mea kompanio.

Haiku 27.

2009-11-16T02:40:00.002+01:00

Promenante tra la sulki,

stoni e sablo

en la shui.

Japoniana arto (I)

2009-11-16T02:34:00.006+01:00

La granda ondo di Kanagawa da Katsushika Hokusai

(Triadek-e-sis vidaji dil monto Fuji)

Haiku 26.

2009-11-11T23:44:00.002+01:00

Ante turnar en l'angulo,

l'odoro di la kastani.

Haiku da Santôka (II)

2009-11-10T17:34:00.004+01:00

Me ne havas pekunio,

me ne havas kozi,

me ne havas denti,

Me esas tote sola.

Santôka (1882 - 1940)

Haiku 25.

2009-11-08T12:33:00.005+01:00

Pluvoza dio,
anke en la desegni,

pluvoza dio.

Haiku da Santôka (I)

2009-11-07T12:07:00.004+01:00

kyô mo ichinichi dare mo konakatta hotaru

Anke ne hodie ulu venis - lampiri.

Taneda Santôka (1882 - 1940)

Haiku 24.

2009-11-07T00:37:00.005+01:00

Kontar steli

dum ke la grilii kantas.

Someral nokto.

Haiku 23.

2009-11-06T11:46:00.004+01:00

Nokturnal promeno.

kun singla lanterno

chanjas l'ombro.

Haiku 22.

2009-11-06T07:13:00.002+01:00

Bruiso di automobili -

vartante l'autobuso,

la plen luno.

Haiku 21.

2009-11-05T16:44:00.002+01:00

Silenco.

La instantala sono

di un zumbo.

Haiku 20

2009-10-20T19:41:00.002+02:00

Finas somero:

me nur vidas un musho

en mea hemo.

Epigramo da Marcial (I)

2009-10-20T19:27:00.004+02:00

Tu esas bela (me savas lo) e yuna (me savas lo)
e richa (qua povos negar ol?)
Ma kande tu laudas tu, Fabula, tante
tu ja ne esas richa, nek bela, nek yuna.

Marco Valerio Marcial (40 - 104)

En la tranquila nokto da Li Bai.

2009-10-09T20:20:00.003+02:00

Me pensas ye la nokto,

avan la lito, la luno brilas

super la pruino esas la dubito.

me regardas adsupre ed esas la plen luno,

me regardas adinfre ed me memoras mea lando.

Li Bai (701 - 762)

En la obskureso da Wang Bai-Yi.

2009-10-09T18:38:00.005+02:00

De la luno me recevas

energio quan me bezonas

por durar regardante ol

e tale me sentas nemortala

kande vere

ni esas misterio.

Wang Bai-Yi

En la monto Huangshan da Wang Bai-Yi.

2009-10-04T11:46:00.003+02:00

Depos kelka yari

me vivas en la monto Huangshan

konsekracita al naturo.

Ma nul jornesko

nek krepuskulo

povos okupar la loko di tua lumo,

la memoro

di tua imajo.

Wang Bai-Yi (681 - 752)

Nokto en la monti da Wang Bai-Yi.

2009-10-03T20:57:00.005+02:00

Senmova quale puteo,

me vidas navigar la steli.

Kande la cikonii venas,

me sentas la koldeso ye mea veini.

Hodie tu ankore ne esos kun me.

Wang Bai-Yi (681 - 752)

Poemo da Shakîr Wa'el

2009-08-29T13:30:00.003+02:00

Me chanjis mea ipsa gardeno

pro un maro di alteso,

un klozita kajo

pro un apertita cielo,

mea du okuli

pro un fora stelo

e pro tua amoro,

quon me povas donar a tu pro tua amoro?

Me havas nulo qua tante valoros.

Shakîr Wa'el (1232 - 1260)

Haiku da Ryûho

2009-08-14T16:33:00.004+02:00

Flori e luno,

me ja savas quale nomesas

la triesma verso.*

Nonoguchi Ryûho (1595 - 1669)

* La triesma verso esas la morto. Ryûho igis skribar ca haiku en sua tombo.

Epigramo di amoro (I) da Teodognis di Alejandría.

2009-08-11T01:20:00.007+02:00

Ne timez, Helena, la ne-vera Zeus,

il ne deziras tu quale me,

il esas Cerbero ligita en la monto

e nur volas l'orala violi

quin tu lansas kande tu pasas.

Teodognis di Alejandría (331 - 257 a.C.)

Haiku da Anon

2009-07-30T17:49:00.004+02:00

sakikomete

hana / ni / eda / naki

sakari / kana

Kun tanta flori

preske ne videsas la branchi

en la cerizolauro.

Anon (yarcento XVI)

Poemo da Omar Khayyam (IV)

2009-07-28T10:49:00.001+02:00

Ye moskei e kirki, serchate vereso
me parolis kun sheiki, santi, filozofi e saji,
me audis la sentenci ekiranta di lia labii
e me ekiris pro la pordo quan me uzis kande me eniris.

Omar Khayyam

Poemo da Omar Khayyam (III)

2009-07-22T17:44:00.005+02:00

Drinkez ni, amoro, drinkez. Omno invitas obliviar.
Me, qua sempre meditas, nur dum du dii
ne volabis pensar nek me nule pensis:
la dio qua venos e la dio qua ja pasis.

Omar Khayyam

Poemo da Omar Khayyam (II)

2009-07-21T12:00:00.008+02:00

La tero esas mozaiko di Dei e kredaji,
di kleriki, profeti, sakra libri e texti:
nekompati, fido, peko, esas nur pretexti
ke la homi advokas por luktar quale feroca bestii.

Omar Khayyam