Haiku-i di Nov-Yaro (Issa)

Ho! Esar quale

un infanto

la Nov-Yaro dio!


Kobayashi Issa (1763 - 1827)

Santa Niklaus serchas...(infantala rakonti por Krist-Nasko)

Santa Niklaus serchas...

View more presentations from yanago.

Poemo da Shu Chung (I)

Esas blanka nubi en la cielo,

granda kosti eskarpa elevas su adsupre.

Sen-fina esas la voyi dil tero,

montari e riveri obstruktas la voyo:

me pregas tu ne mortar.

Voluntez retorvenar itere.

Me savas omna la rakonti (León Felipe)

Me tradukis mikra ma bela poemo dil Hispana poeto León Felipe qua mortis en Mexikia ye la yaro 1968.

Me ne savas multa kozi, to esas la vereso.

Me nur dicas to quon me vidis.

E me vidis:

ke on bersis la bersilo dil homo per rakonti...

ke la klamadi d’angoro dil homo sufekesis dal rakonti...

ke on tamponizas la plorado dil homo per rakonti

ke on enterigas l’osti dil homo per rakonti...

e ke la pavoro dil homo inventis omna la rakonti.

Me ne savas multa kozi, to esas la vereso.

Ma on dormis a me per omna la rakonti…

E me savas omna la rakonti…

Haiku 37.

jorneskas -

anke en la sek folii

la brilo dil roso

Irlandana benediko.

Kom Krist-nasko proximigeskas, me trovis ca Irlandana benediko quan me tradukis.

Ke la voyi apertesez ye tua renkontro,
ke la suno brilez sur tua vizajo,
ke la pluvo falez tranquila
sur tua agri,
ke la vento suflez sempre ye tua dorso.

Ke tu gardez ye tua kordio kun gratitudo
la belega memoro
dil kozi bona dil vivo.

Ke omna donacajo di Deo kreskas ye tu
e helpez tu por portar la gayeso
aden la kordii di ti personi quin tu amas.

Ke tua okuli reflexez brilo
di amikeso,
afabla e jeneroza quale la suno,
qua ekiras inter la nubi
e varmigas la maro tranquila.

Ke la forco di Deo mantenez tu ferma,
ke l’okuli di Deo regardez tu,
ke l’oreli di Deo askoltez tu,
ke la vorto di Deo parolez a tu,
ke la mano di Deo, protektez a tu,
e ke til un nova renkontro,
altru tenis tu e ni omna,
per la palmo di lua mano.

Jarcha* (I)

En la Hispan-araba linguo.

¡Tanto amare, tanto amare,
habib, tant amare!
Enfermeron olios nidios,
e dolen tan male

Tradukita aden Ido.

Tante amar, tante amar,
mea amoranto, tante amar!
Maladeskis mea brilanta okuli
e tante li doloras a me!

Hike esas plu multa lumo (sufí-ana legendo II )

Ulu vidis Nasrudin serchanta ulo en la sulo.
- Quon tu perdis, Mulá*? – il questionis.
- Mea klefo . – respondis la Mulá*.
Tale, ambi genupozis su por serchar lu. Pos poka tempo, la homo itere questionis:
- Ube la klefo falis exakte?
- Ye mea domo.
- Tale…pro quo vu serchas hike?
- Esas plu multa lumo hike kam en mea domo.

Nasrudin

Nasrudin (anke Nasreddin)

Qua levas frue...(sufi*-ana legendo I )

- Nasrudín, mea filiulo, levez tu frue matine.

- Pro quo, patro?

- Esas bona kustumo. Uladie, me levis me frue ante jorneskar e me ekiris promenar. En la voyo,
me trovis ula burso qua kontenis oro.

- Quale tu savas ke ol ne perdesis ye la antea nokto?

- To ne esas la questiono nun. Irgaforme, me verifikis ke ye la antea nokto la burso ne esis ibe.

- Tale, me kredas ke levar su frue ne donas fortuno ad omni nam…qua perdis l’oro posible levis su ante kam tu.

Poemo da Abu-l-Hasan al-Husri

Se la blanka esas la koloro dil vesto

en al-Andalus, to esas yusta kozo.

Ka tu ne vidas a me, qua vestizesas per la blanka

hari pro ke me trauras pro la yuneso?

Abu-l-Hasan al-Husri, la blindulo. (m. 1095)

Haiku da Gonsui

La vintrala tempesto

finas ye la bruiso

dil maro.

Ikenishi Gonsui (1650 - 1722)

Haiku da Michihiko

la luno, la nivo,

e nun, tra la pluveto,

la lumo dil matino!

Oku Michihiko (1755 - 1818)

Haiku da Sora

Me marchas omnadie.

Se me mustas falar,

ke co esez inter l'arbori.

.

Kawai Sora (1649 - 1710)

Haiku da Sodô

Havas nulo

mea kabanacho printempe.

Olu havas omno.

Yamaguchi Sodô (1642 - 1716)

Haiku da Kigin (I)

Esas la povreso dil somero.

Elu respondas

ante ploreskegar.

.

Kitamura Kigin (1623 - 1705)

Po Chu - I

Po Chu-I naskis ye Xia-kuei, en Shen-xi en la yaro 772. Esis guvernanto di Hang-chow e Shu-chow. Il verkis la du maxim konocata larga poemi dil epoko Tang. On dicas ke Po Chu-I lektis lua poemi al lavistini en la rivero ed il nur konsideris lua poemi kom bona kande eli komprenis li. Il mortis ye la yaro 846.

Poemo da Po Chu-I (I)

Sugesto a mea amiko Liu

Esas verda brilo ye ula anciena botelo,
on povas vidar la reda ye la tranquila stuvo.
On sentas la koldeso ye la nivo ibe fore...
Ka ulo de vino hike en la domo?

Po Chu-I (772-846)

Poemo da Wang Wei (I)

La bosko di bambuo.

Me sideskesas sola, en la bosko di bambuo,
me pleas la liuto, me suflas dum multa tempo.
Poka homi konocas la profunda bosko,
la brilanta luno venas e proximigas lua klareso.

Wang Wei (699-759 d.C.)

Haiku da Santôka (V)

Kande onu ne povas manjar,
la fresheso dil aquo

Taneda Santôka (1882 - 1940)

Poemo da Shakîr Wa'el (II)

Serchate libereso,
me finabis ye la pordo
di tua karcero
e me ja ne konocas
plusa klefo kam tua amoro.

Shakîr Wa'el (1232 - 1260)

Haiku da Shokaku (I)

Dekesma monato dil yaro.
Me iras aden nula loko,
nulu venas ad-hike.


Shokaku (1650 - 1722)

Haiku da îo Sôgi

Maiflori, pensez
ke qua voyajas
anke regardas vi.

Îo Sôgi (1421 - 1502)

Mikra rakonto.

Nur la vento parkuras la pavara stradi. Nek sospiri, nek “me amas tu”, nek disputi, nek la plorado di un infanto. Nur la vento. Sub cent-yara arboro, apud la kirko me regardas la horizonto, makulizata di reda pro la noktesko. Fore, hano kantas. Hano di fora vilajeto ube ankore habitas ulu. Ulu. Ulu esas personigeso di nulu. Pro ke hike esas nulu. Nulu kantas, nek ploras, nek ridas, nek jemas. La folii kovras, quale omna autuno, la stradi dil vilajeto, ma nulu presas li. Nur la vento movas li. Me mustas askoltar ulu. Pro to, me klamas e, dum kelka sekundi, me askoltas mea eko.

Haiku 36

tante efemera...
la flori dil ceriz-arboro
en la voyo

Trista militi da Miguel Hernández

Trista militi
se ne esas amoro la skopo
trista, trista.

Trista armi
se ne esas la vorti.
Trista trista.

Trista homi
se ne mortas pro amoro.
Trista, trista.

Poemo da la Hispana poeto Miguel Hernandez qua naskis ye 1910 e mortis pos la Hispana civitanala milito ye la karcero di Alicante en la yaro 1942 evante nur 31 yari.

Poezio (originala poemo)

La poezio
esas realeso.
La poezio esas la nubo en la cielo,
la rozo en la gardeno,
la ucelo di la mateno,
la kiso por tu.
La poezio
esas realeso.
La cikonio qua mortis,
La infanto qua ja ne ploras
pro ke anke mortis.
La poezio anke es
la nubo qua makulizesis
e ke me itere ne volas vidar.
La poezio
ne esas la inventata nebulo,
nek la ruptita binoklo por ne vidar.
La poezio
esas la binoklo
kun qua vidar
la mondo e la realeso,
kun qua vidar
la vereso.

Haiku 36.

pasis la pluvo -
l'uni pos l'altri
l'infanti ye la flako

Saigyō Hōshi

Saigyō Hōshi naskis en Kioto ye la yaro 1118 e

mortis en la templo di Hirokawa evante 72 yari.

Desegno da Kikuchi Yōsai.

Waka da Saigyō (I)

moro tomo ni

tabi naru sura ni

tsuki idete

sumebaya kage no

aware naruran

Kune ni facus

la voyajo; me sur la tero,
e lu en la cielo,

se esus la luno dum tota la nokto:

duopla konkordo.

.

Saigyō (1118 - 1190)

Haiku da Kijoo.

tooyama / no
yuki / ni / tobi / keri
karasu / niwa

Sur la nivo
en ita fora monto
flugas du korvi.

Kijoo

Haiku da Shiki.

daikan / ya
hachigatsu / hoshiki
matsu / no / tsuki


Esas vintro,
krucante la vilajeto
aboyas la hundi.

Shiki (1862 - 1902)

Haiku 35.

pordo apertesas -
nulu enir nek ekir
ecepte la vento

Haiku 34.

sen direciono,

movita da la vento,

la sek folii

Haiku 33.

Ye la tombeyo,

cipresi e tombi

kovrita da nivo.

Haiku 32.

recenta flako -

ye la reflexo dil arboro

drinkas l'uceli

Haiku da Issa

Shôgatsu / no

kodomo / ni / natte

mitaki / kana

Ye la Nov-Yaro,

qua povus itere

divenor infanto!

Kobayashi Issa (1763 - 1827)

Haiku da Sôkan (II)

gantan / no

miru / mono / ni / sen

Fuji / no / yama

Nov-Yaro dio:

lo maxim bone esas regardar

la monto Fuji.

Sôkan (1465 - 1553)